Mā PHARMAC e utu ngā rongoā mate huka hou ki ētahi paearu Special Authority kua panonihia

Ko ngā tāngata kei a rātou te mate huka tuarua tūraru-nui nei, e eke nei anō hoki ki ngā paearu o te utu, kua āhei tā rātou whātoro ki te empagliflozin kua utua (me te metformin, me te kore rānei ōna) ā te 1 o Pēpuere 2021. Kua āhei hoki te whātoro ki te dulaglutide kua utua ka whakaaehia ana e Medsafe. 

“Ko ngā tāngata e mate ana i te mate huka, ko ō rātou whānau, me ngā mātanga hauora, i mea mai me utu rawa ēnei rongoā pai kia āta whakatauhia ai tēnei mate huka tuarua e tipu haere nei i Aotearoa” hei tā Sarah Fitt, te manahautū o PHARMAC. 

E mea ana ngā taunaki he nui noa atu ngā mahi a ēnei rongoā i te whakaheke noa iho i te nui o te huka ki ngā tāngata kei a rātou te mate huka tuarua tūraru-nui nei. Ka taea hoki te whakatau i ngā raruraru ka hua mai i te mate huka tuarua, pēnei i te mate tākihi me te mate manawa i roto i ngā tāngata he nui te tūraru kia pāngia ki ēnei raruraru.

“Tuatahi ai i tono mātou kia utua te empagliflozin (me te metformin, me te kore rānei ōna) i te 1 o Tīhema 2020, heoi, i nui ngā arotakenga whiriwhiri i tae mai ki a mātou, ana, i roa te wā ki te āta wetewete. Mutu ana te āta wete i ngā arotakenga whiriwhiri ka panoni mātou i ētahi wāhanga o ngā paearu Special Authority i tonoa tuatahitia ai e mātou.”

Ko ngā panonihanga i ngā paearu e āta whai ana kia taea ai ēnei rongoā te kapo ake e ngā tāngata kei a rātou te mate huka tuarua me te nui o te tūraru kia pāngia ki ngā raruraru ā-tākihi, ā-manawa anō hoki.  

“Kua whakatau hoki mātou kia āta huaina te iwi Māori me Ngā Iwi o Te Moana Nui a Kiwa ki roto ki ngā paearu o te utu. He tuatahitanga tēnei te whakauru i ēnei kupu ki ngā paearu Special Authority nei. He mahi kua āta mahia kia mātua whakatairangahia ai te mana taurite kia tīkina ēnei rongoā e ngā iwi e pā nuitia ana ki ngā raruraru o te mate huka tuarua, ka mutu he taunaki pū e mea ana kāore e taurite ana te mana kia tīkina he rongoā. E hiahia ana mātou kia mihia ngā tāngata me ngā ohu i takoha mai i ā rātou tino arotakenga i tautoko i tēnei whakatau,” hei tā Ms Fitt.

“E mōhio ana mātou ehara mā te utu noa iho i te rongoā e hinga ai ngā taunahua huhua kei ngā aroaro o te tāngata. He nui kē atu ngā matenga ā-hanga nei i te pūnaha hauora e kore e taea te whakatika e PHARMAC kau noa. Ka mutu, e kore ngā hē ā-hauora e taea nei te whakatika e te rongoā kau noa, me te mea hoki e aro pū ana ēnei rongoā ki te whakaora, tē aro ai ki te aukati mate, heoi anō, e mōhio ana hoki mātou he mahi tā PHARMAC.

E ū ana a PHARMAC kia haere tonu āna mahi kia utua he rongoā atu anō mō tāngata atu anō, e horaina atu ai ngā hua hauora pai rawa atu ki ngā tāngata o Aotearoa, mā tā mātou tahua pūtea tonu. Ko te utu tuatahi mā te tōpūtanga tahua pūtea ā-whāmehi o ēnei rongoā e rua, te whakapae, ko tōna $125 miriona i roto i te 5 tau.